Vazirlar Mahkamasining 382-sonli qarori bilan birlamchi tibbiy-sanitariya yordami (BTSYo) muassasalarida Davlat byudjeti mablag‘lari hisobidan qoplanadigan tibbiy yordamning kafolatlangan hajmlari (kafolatlangan paket) tasdiqlandi.

Prezidentimizning 2024-yil 5-sentabrdagi PQ-311-sonli “Davlat tibbiy sug‘urtasi mexanizmlarini joriy etishga oid chora-tadbirlar to‘g‘risida” qaroriga muvofiq hujjat bilan tasdiqlandi:

birlamchi tibbiy yordam muassasalarida Davlat byudjeti mablag‘lari hisobidan qoplanadigan tibbiy yordamning kafolatlangan hajmi (kafolatlangan paket);

kafolatlangan paketga kiritilgan tibbiy xizmatlar va dori vositalari ro‘yxati;

birlamchi tibbiy yordam muassasalari uchun kafolatlangan paketni hisoblash tartibi to‘g‘risidagi nizom.

Imtiyozli toifadagi shaxslarni davolash vrach ko‘rsatmasi bo‘yicha “Elektron sog‘liqni saqlash” axborot tizimi orqali shakllangan yo‘nalma asosida Davlat byudjeti mablag‘lari hisobiga bepul amalga oshiriladi.

Xususan, bepul tibbiy xizmatlar ro‘yxatiga quyidagilar kiritilgan:

bemorlarni qabul qilish, davolash va maslahat berish;

bolalarni yosh toifalari bo‘yicha davriy profilaktik va skrining tekshiruvlari;

diagnostika uchun zarur tahlillar va tekshiruvlar (jumladan, qon tarkibidagi glyukoza va xolesterin darajasini tekshirish, 40 yoshdan oshgan aholida elektrokardiogramma, bachadon bo‘yni skriningini, ayollar orasida saratonni profilaktika qilish uchun ko‘krak skriningini, antropometriya, auskulьtatsiya, oftalьmoskopiya, rinoskopiya va boshqalar).

Har yili 1-avgustgacha Sog‘liqni saqlash vazirligi kelgusi yil uchun kafolatlangan paket hajmini shakllantiradi, zarur mablag‘lar esa Iqtisodiyot va moliya vazirligi tomonidan Davlat byudjeti parametrlarida hisobga olinadi.

Kafolatlangan paket aholi orasida eng keng tarqalgan kasalliklarni profilaktika qilish va davolashga qaratilgan bo‘lib, quyidagi tibbiy xizmatlar turlarini qamrab oladi:

shoshilinch tibbiy yordam;

rejali tibbiy xizmat ko‘rsatish;

palliativ tibbiy yordam.

Eslatma tariqasida, 2026-yil 1 yanvardan boshlab davlat tibbiy sug‘urta mexanizmlari joriy etilgan viloyatlarda tuman (shahar) va hududiy darajadagi tibbiyot muassasalarida elektron navbat asosida rejali statsionar tibbiy yordamni bepul olish huquqiga ega bo‘ladilar:

JShDSni yoki ijtimoiy soliqni to‘lovchilar;

Soliq kodeksiga muvofiq mehnat stajini hisoblash uchun zarur bo‘lgan belgilangan soliq miqdorlarini to‘lagan shaxslar;

voyaga etmaganlar, ta’lim tashkilotlarining o‘quvchi va talabalari, homilador ayollar va ikki yoshgacha bola parvarishi bilan band shaxslar, mehnat organlari tomonidan ishsiz sifatida rasman ro‘yxatga olingan shaxslar, davlat pensiyasini oluvchilar va “Ijtimoiy himoyaning yagona reestri” axborot tizimi orqali kam ta’minlangan deb tan olingan oilalar a’zolari yoki “Kambag‘al oilalar reestri” axborot moduli orqali kambag‘al deb tan olingan oilalar a’zolari.