Qonunchilikka ko‘ra, erto‘la yoki uning bir qismini erto‘ladan foydalanuvchiga berish ko‘p kvartirali uydagi joylar mulkdorlari umumiy yig‘ilishining qarori asosida amalga oshiriladi. Bunda, foydalanishga berilayotgan umumiy mol-mulkka bo‘lgan huquqlar ushbu joylar mulkdorlarining nomiga davlat ro‘yxatidan o‘tkazilgan bo‘lishi shart. Ko‘p kvartirali uylarni boshqarish organi erto‘ladan foydalanish bo‘yicha tuzilgan shartnomalarni soliq organlarining elektron tizimida hisobga qo‘yilishini ta’minlaydi.

Jismoniy va yuridik shaxslar erto‘lani foydalanishga olish uchun ko‘p kvartirali uyni boshqarish organiga yozma ravishda murojaat qiladi.

Yozma murojaatga quyidagi hujjatlar va ma’lumotlar ilova qilinadi:

▪️ yuridik shaxsning davlat ro‘yxatidan o‘tkazilganligi to‘g‘risida guvohnoma (jismoniy shaxs bo‘lsa uning shaxsini tasdiqlovchi hujjat) nusxasi;

▪️ amalga oshirilishi rejalashtirilayotgan faoliyat turi, erto‘ladan foydalanish maqsadi, erto‘ladan talab etilayotgan maydon o‘lchami to‘g‘risida to‘liq ma’lumot.

Erto‘lani faoliyat turiga moslashtirish hamda qulayligini yanada oshirish maqsadida joyni ta’mirlash va qayta rejalashtirish ishlari talab etilgan taqdirda, bu to‘g‘risida ma’lumot taqdim etiladi.

Ko‘p kvartirali uyning erto‘la qismini foydalanishga berish yuzasidan umumiy yig‘ilishda qaror qabul qilinishi uchun barcha joylar mulkdorlarining yoki ular vakillarining ellik foizidan ko‘prog‘i hozir bo‘lishi kerak. Umumiy yig‘ilishning qarori, agar uni yoqlab umumiy yig‘ilishda hozir bo‘lgan joylar mulkdorlarining yoki ular vakillarining kamida ellik foizi ovoz bersa, qabul qilingan deb hisoblanadi.

Ko‘p kvartirali uyning erto‘lasida quyidagi faoliyat turlari bilan shug‘uldanishga yo‘l qo‘yilmaydi:

▪️ uyni qurishda o‘tiriladigan joylari soni loyiha hujjatlarida nazarda tutilmagan, shuningdek, soat 23.00dan keyin ham ishlaydigan umumiy ovqatlanish korxonalari, restoranlar, kafelar, kafeteriylar, barlar;

▪️kimyoviy tovarlar, sabzavot va baliq mahsulotlarini, shuningdek, gaz ballon, kimyo vositalari, engil alangalanuvchi va yonuvchi suyuqliklar hamda portlab yonish xavfliligi jihatidan xavfli bo‘lgan boshqa moddalar va materiallar bor bo‘lgan mahsulotlarni sotuvchi do‘konlar;

▪️o‘z ishlab chiqarishida tez yonuvchi moddalarni qo‘llovchi kimyoviy tozalash xonalari;

▪️10 tadan ortiq ish o‘rniga ega bo‘lgan poyabzal tikish va ta’mirlash ustaxonalari;

▪️ hammomlar va saunalar;

▪️aloqa tarmoq stantsiyalari, shaharlararo aloqaning kecha-kunduz foydalaniladigan so‘zlashuv punktlari va telegraf;

▪️ jamoat hojatxonalari;

▪️marosimlar bilan bog‘liq xizmatlar ko‘rsatish muassasalari;

▪️sanoat korxonalari faoliyatining barcha turlari;

▪️uy hayvonlari va parrandalari boqishga yoki ko‘paytirishga mo‘ljallangan joylar;

▪️jismoniy va yuridik shaxslarning transport vositalari uchun garajlar (maxsus loyixa asosida qurilgan garajlar bundan mustasno);

▪️yashash joylari, kinoteatr, yotoqxona va mehmonxonalar tashkil etish.

Shuningdek, ko‘p kvartirali uyning erto‘lasida yuqorida ko‘rsatilgan cheklovlarga rioya qilgan holda quyidagi faoliyat turlari bilan shug‘ullanishga yo‘l qo‘yiladi:

1) oziq-ovqat va nooziq-ovqat tovarlari bilan savdo qilish (do‘konlar, kioskalar, do‘konchalar va boshqalar);

2) maishiy xizmat ko‘rsatish (sartaroshxonalar, poyabzal tikish va ta’mirlash, optika, soat sozlash ustaxonalari, tikuvchilik va kashtachilik, atelьe);

3) umumiy ovqatlanish (restoranlar, kafe, kafeteriylar, muzqaymoq va chanqovbosdi ichimliklar barlari, gazakxonalar);

4) bank xizmatlari ko‘rsatish (banklarning bo‘limlari va valyuta almashtirish punktlari);

5) aloqa xizmatlari ko‘rsatish (pochta bo‘limi) va kurьerlik faoliyati;

6) gazetalar, jurnallar va kitob mahsulotlari bilan savdo qilish;

7) bijuteriya va jevaklarni tayyorlash va ta’mirlash;

8) gulchambarlar, sun’iy gullar va gul marjonlarini tayyorlash;

9) rassomchilik va haykaltaroshlik;

10) xizmat ko‘rsatish va tadbirkorlarning ofislari hamda idoralari;

11) video va fotosuratga olish hamda kompьyuter xizmatlari;

12) tarjima va tahrir xizmatlari;

13) dizayn, chizmachilik-grafika xizmatlari;

14) kiyim-kechak va idishlarni ijaraga berish xizmati;

15) rieltorlik faoliyati;

16) gazlamalarga naqshlar solish, trafaretli bosma va qo‘lda rasm chizish xizmatlari;

17) jismoniy tarbiya va sport muassasalari faoliyati;

18) davlat tashkilotlarini joylashtirish;

19) sug‘urta tashkilotlarini joylashtirish.

Erto‘ladan foydalanuvchi quyidagilarga majbur:

▪️foydalanish joyini, erto‘ladan foydalanish bilan bog‘liq bo‘lgan ko‘p kvartirali uyga tutash er uchastkasi, umumiy foydalaniladigan joylarning, shuningdek, umumiy mol-mulkning lozim darajadagi texnik va sanitariya holatini saqlashga, ularga oid xarajatlarni qoplashda ishtirok etishga hamda qonunchilik hujjatlarida belgilangan tartibda va muddatlarda to‘lashga;

▪️muhandislik kommunikatsiyalariga (elektr tarmoqlari, ichimlik suv, oqova suv, issiqlik hamda gaz ta’minoti quvurlari, jihozlari va boshqalarga) ehtiyotkorlik bilan munosabatda bo‘lishga;

▪️ichimlik suv va elektr energiyasidan foydalanganda hisoblagichlarni o‘rnatishga;

▪️erto‘laning muhandislik kommunikatsiyalarida nosozliklar aniqlangan taqdirda, darhol avariyalarni bartaraf etishning mumkin bo‘lgan chora-tadbirlarini ko‘rishga hamda zarur hollarda tegishli avariya-dispetcherlik xizmatiga xabar berishga;

▪️avariya holatlari yuz berganda kecha-kunduzning istalgan soatida foydalanib turgan joyiga avariyalarni bartaraf etish uchun tegishli avariya-dispetcherlik xizmati xodimlarining kirishini ta’minlashga.

Muhim! erto‘ladan foydalanganlik uchun to‘lab beriladigan ijara to‘lovlari ushbu ko‘p kvartirali uyning umumiy mol-mulkini saqlash xarajatlariga yo‘naltiriladi.