Unga ko‘ra, barcha toifalardagi avtotransport vositalaridan chiqariladigan ifloslantiruvchi moddalar tashlamalarining atmosfera havosiga zararli taʼsiri bo‘yicha yo‘l qo‘yiladigan normativlarga mosligini nazorat qilish bo‘yicha “Ekologik transport” tizimi bosqichma-bosqich joriy etiladi.

Maqsad, avtomatik baholash tizimi yordamida ekologik stikerlar berish orqali avtotransport vositalarini “yashil”, “sariq” va “qizil” ranglar bilan belgilanadigan “toza”, “o‘rta” va “zararli” ekologik toifalarga ajratib borish.

Shuningdek, ekologik toifasi hududning ekologik zonasiga muvofiq bo‘lmagan avtotransport vositalariga nisbatan ekologik kompensatsiya to‘lovlarini joriy etish yoxud ulardan tegishli ekologik zonalar hududida foydalanishni cheklash yoki taqiqlash.

Jumladan, ekologik stikerlar quyidagi transport vositalariga nisbatan tatbiq etilmaydi:

— O‘zbekiston Respublikasi hududi orqali tranzit olib o‘tiladigan;

— belgilangan tartibda vaqtincha (to‘qson kalendar kungacha) O‘zbekiston Respublikasi hududida bo‘lgan;

— elektromobillar, elektromototsikllar, mototsikllar, skuterlar, mopedlar, uch g‘ildirakli transport vositalari;

— tezkor va maxsus xizmatlarning ko‘k yoki qizil yoxud ko‘k va qizil rangli yaltiroq mayoqcha bilan jihozlangan hamda maxsus rangli bo‘yoq sxemalar va yozuvlar bilan belgilangan transport vositalari hamda jamoat transporti (taksi va yo‘nalishli taksidan tashqari);

— qishloq xo‘jaligi texnikalari;

—“nogironligi bo‘lgan shaxs” belgisi o‘rnatilgan transport vositasi.

 “Ekologik transport” tizimi 2026 yil 1 yanvardan boshlab Toshkent shahrida joriy etiladi.